விமானங்கள் வானில் பறக்கும்போது அவற்றின் என்ஜின்களில் இருந்து வெளியேறும் நீராவி, மிகவும் குளிரான மற்றும் ஈரப்பதம் அதிகமுள்ள உயரமான வளிமண்டலப் பகுதிகளைச் சந்திக்கும் போது, சிறிய பனித்துகள்களைக் கொண்ட நீண்ட மேகப்பாதைகள் உருவாகின்றன. இவை ‘காண்ட்ரெயில்ஸ்’ (Contrails – Condensation Trails) எனப்படுகின்றன. அவை புகை அல்ல; குறிப்பிட்ட வளிமண்டலச் சூழலில் உருவாகும் பனித்துகள்கள் நிறைந்த மேகங்கள். சில காண்ட்ரெயில்கள் நீண்ட நேரம் நீடித்து விரிவடைந்து cirrus மேகங்களாக மாறக்கூடும். இவை பூமியிலிருந்து வெளியேறும் வெப்பத்தை வளிமண்டலத்தில் தக்கவைத்துக்கொள்வதால், விமானப் போக்குவரத்தின் மொத்த காலநிலைத் தாக்கத்தில் முக்கியப் பங்கு வகிக்கின்றன.
இந்தச் சிக்கலைக் குறைக்க Google Research, American Airlines மற்றும் Breakthrough Energy ஆகியவை இணைந்து செயற்கை நுண்ணறிவு அடிப்படையிலான காண்ட்ரெயில் முன்னறிவிப்பு அமைப்பை உருவாக்கியுள்ளன. செயற்கைக்கோள் படங்கள், வானிலைத் தகவல்கள், விமானப் பாதைத் தரவுகள் உள்ளிட்ட மிகப்பெரிய தரவுத்தொகுப்புகளை AI ஒருங்கிணைத்து, எந்தப் பகுதிகளில் விமானங்கள் காண்ட்ரெயில்களை உருவாக்க அதிக வாய்ப்புள்ளது என்பதை கணிக்கிறது. பின்னர் அந்தத் தகவலைப் பயன்படுத்தி விமானிகள் அல்லது flight planners, பாதுகாப்பு மற்றும் செயல்பாட்டு விதிகளுக்குள் சிறிய உயர மாற்றங்களைச் செய்து அந்தப் பகுதிகளைத் தவிர்க்க முடியும்.
இந்த முயற்சியின் ஆரம்ப கட்டச் சோதனையில் American Airlines விமானிகள் 70 சோதனைப் பயணங்களில் AI கணிப்புகளைப் பயன்படுத்தினர். பின்னர் செயற்கைக்கோள் படங்களை ஆய்வு செய்தபோது, AI வழிகாட்டுதலைப் பயன்படுத்திய பயணங்களில் காண்ட்ரெயில் உருவாக்கம் 54% குறைந்ததாக கண்டறியப்பட்டது. அதே நேரத்தில், காண்ட்ரெயில் உருவாகும் பகுதிகளைத் தவிர்க்க முயன்ற விமானங்களில் சுமார் 2% கூடுதல் எரிபொருள் பயன்படுத்தப்பட்டது. Google-ன் மதிப்பீட்டின்படி, அனைத்து விமானங்களையும் மாற்ற வேண்டிய அவசியமில்லாததால், முழு விமானப் படைக்கு ஏற்படும் சராசரி எரிபொருள் தாக்கம் மிகவும் குறைவாக இருக்கக்கூடும்.
இதன் அடுத்த கட்டமாக, 2025-ல் American Airlines மேற்கொண்ட சுமார் 2,400 transatlantic flights கொண்ட பெரிய அளவிலான சோதனையில், flight-planning software-க்குள் Google-ன் காண்ட்ரெயில் கணிப்புகள் நேரடியாக இணைக்கப்பட்டன. வெற்றிகரமாக avoidance plan-ஐப் பின்பற்றிய பயணங்களில், கட்டுப்பாட்டு குழுவுடன் ஒப்பிடும்போது காண்ட்ரெயில் உருவாக்க விகிதம் 62% குறைந்ததாக Google தெரிவித்துள்ளது.
இப்போது இந்த தொழில்நுட்பம் தனிப்பட்ட விமான நிறுவனச் சோதனைகளைத் தாண்டி, முழு வான்வெளி அளவில் சோதிக்கப்படுகிறது. 2026 ஆகஸ்ட் மாதம் தொடங்கப்பட்ட “Operation Blue Skies” என்ற 30 மாத ஆய்வில், UK அரசு மற்றும் Google இணைந்து North Atlantic-ன் Shanwick Oceanic Control Area பகுதியில் காண்ட்ரெயில் உருவாகும் வாய்ப்புள்ள இடங்களைத் தவிர்க்க சில விமானங்களின் உயரத்தை சிறிய அளவில் மாற்றும் முயற்சியை மேற்கொள்கின்றன. சில சோதனை விமானங்களுக்கு அதிகபட்சம் சுமார் 2,000 அடி வரை மாற்றம் செய்யப்படலாம்.
இதன் முக்கியத்துவம் என்னவென்றால், விமானங்களின் இயல்பான செயல்பாட்டையே முழுமையாக மாற்றாமல், “எங்கே பறக்கிறோம்?” என்பதைக் கொஞ்சம் புத்திசாலித்தனமாகத் தேர்ந்தெடுப்பதன் மூலம் காலநிலைத் தாக்கத்தைக் குறைக்க முடியுமா? என்பதையே இந்தத் தொழில்நுட்பம் சோதிக்கிறது. இருப்பினும், காண்ட்ரெயில்களின் காலநிலைத் தாக்கத்தைத் துல்லியமாக மதிப்பிடுவது இன்னும் அறிவியல் ரீதியாக சிக்கலானது என்பதால், நீண்டகாலப் பயன்பாட்டுக்கு மேலும் ஆய்வுகளும் பெரிய அளவிலான சோதனைகளும் தேவைப்படுகின்றன.
