மாலை நேரத்தில் பள்ளியில் இருந்து வீடு வரும் குழந்தைகளுக்கு சிப்ஸ் மற்றும் ஃபாஸ்ட் ஃபுட் போன்ற ஸ்னாக்ஸ் வகைகளை தவிர்த்து நமது நாட்டு உணவுகளான சத்துமாவு கஞ்சி, களி உள்ளிட்டவை கொடுப்பதன் மூலம் குழந்தைகளுக்கு உடல் ஆரோக்கியமாகவும் சத்தாகவும் இருக்க உதவும்.
தேவையான பொருட்கள்:
கருப்பு உளுந்து: 1 கப்
கருப்பு கவுனி அரிசி: 1/4 கப்
கருப்பட்டி (வெல்லம்): 1 – 1.5 கப் (இனிப்புக்கு ஏற்ப)
நல்லெண்ணெய்: தேவையான அளவு
தண்ணீர்: 3-4 கப்
செய்முறை:
அரைத்தல்: கருப்பு உளுந்து மற்றும் அரிசியை தனித்தனியாக அல்லது ஒன்றாக மிதமான தீயில் வாசனை வரும் வரை வறுக்கவும்
பின்னர் நன்றாக ஆறியதும், மிக்ஸியில் சேர்த்து மெல்லிய மாவாக அரைத்துக் கொள்ளவும்.
பாகு காய்ச்சுதல்: கருப்பட்டியை சிறிதளவு தண்ணீரில் கரைத்து, வடிகட்டி, அதன் பாகை காய்ச்சி, நுரை வந்ததும் இறக்கவும்.
களி கிளறுதல்: ஒரு கனமான பாத்திரத்தில் அரைத்த மாவு, தண்ணீர் சேர்த்து கிளறவும், வெல்லப் பாகை சிறிது சிறிதாக ஊற்றி கட்டிகள் இல்லாமல் கரைக்கவும்.
வேக வைத்தல்: அடுப்பில் வைத்து மிதமான தீயில், தொடர்ந்து கிளறிக்கொண்டே இருக்கவும். மாவு கெட்டியாகி, பாத்திரத்தில் ஒட்டாமல் சுருண்டு வரும் வரை கிளறவும்.
எண்ணெய் சேர்த்தல்: களி நன்றாக வெந்ததும், சிறிது சிறிதாக நல்லெண்ணெய் சேர்த்து, மேலும் 2-3 நிமிடங்கள் கிளறி இறக்கவும்.
குறிப்புகள்:
இதை குழந்தைகளுக்கு கொடுக்கும் போது, சுவைக்கு ஏற்ப வெல்லத்தின் அளவை மாற்றிக்கொள்ளலாம்.
கர்ப்பிணிப் பெண்கள் மற்றும் பிரசவத்திற்குப் பின் சாப்பிடுவதற்கு இது மிகவும் நல்லது.
டிப்ஸ்:
ஐந்து டம்ளர் கருப்பு உளுந்து என்ற அளவிற்கு இரண்டு டம்ளர் அளவு கருப்பு கவுனி அரிசி சேர்த்து அரைத்தால் சரியான அளவாக இருக்கும்.
கருப்பு உளுந்து வறுக்கும்பொழுது சிறிதளவு வெள்ளை உளுந்தை போட்டு வறுக்கும் பொழுது கருப்பு உளுந்து வறுபடும் அளவை தெரிந்து கொள்ள உதவும்.
அதேபோல் கருப்பு கவுனி அரிசியை வறுக்கும் பொழுது சிறிதளவு பச்சரிசி போட்டு வறுக்கும் பொழுது வருபடும் அளவை எளிதில் கண்டுபிடிக்கலாம்.
இரண்டையும் வறுத்த பிறகு ஒன்று சேர்த்து ஆற வைத்து பிறகு மாவு மில்லில் கொடுத்து அரைத்து வைத்துக் கொண்டால் அடிக்கடி களிசெய்ய உதவியாக இருக்கும்.
