ரஷ்யாவில் தன்னைத் தள்ளிய நபரைத் திருப்பித் தாக்கப் பாய்ந்த ரோபோட்: ‘எந்திரன்’ பட பாணியில் அதிர்ச்சி சம்பவம்!
ரஷ்யாவில் உள்ள ஒரு பிரபல தொழில்நுட்பக் கடையில், தன்னைத் தள்ளிவிட்டு அச்சுறுத்த முயன்ற நபரை அங்கு இருந்த ரோபோட் ஒன்று உடனடியாகத் திருப்பித் தாக்கப் பாய்ந்த வீடியோ இணையதளங்களில் வெளியாகிப் பெரும் அதிர்ச்சியையும் பரபரப்பையும் ஏற்படுத்தியுள்ளது.
கடையில் நின்று கொண்டிருந்த ரோபோட்டை நபர் ஒருவர் திடீரென பிடித்துத் தள்ளியதைத் தொடர்ந்து, கோபமடைந்த மனிதரைப் போலச் சண்டைக்குப் பாய்ந்த அந்த ரோபோட், அவரைத் தாக்க முயன்றதோடு கால்களால் எட்டி உதைக்கத் தொடங்கிய காட்சி ‘எந்திரன்’ படத்தில் வரும் சிட்டி ரோபோட்டின் ஆக்ரோஷமான காட்சியை நேரில் பார்ப்பது போல் அமைந்திருந்தது.
இறுதியில் கடையில் இருந்த மற்ற நபர்கள் ஓடிவந்து அந்த ரோபோட்டைப் பிடித்துக் கட்டுப்படுத்திய நிலையில், ஏஐ (AI) மற்றும் ரோபோட்டிக்ஸ் தொழில்நுட்பத்தின் அதிவேக வளர்ச்சியும், அவற்றின் மனித பாணி எதிர்வினைகளும் எந்த அளவுக்குத் தீவிரமடைந்து வருகின்றன என்பதை இந்தச் சம்பவம் உலகளவில் வெளிச்சத்திற்குக் கொண்டுவந்துள்ளது.
