சான் பிரான்சிஸ்கோ – மும்பை ஏர் இந்தியா விமானத்தில் தொழில்நுட்பக் கோளாறு: கொல்கத்தாவில் பயணிகள் இறக்கிவிடப்பட்டனர்.
சான் பிரான்சிஸ்கோவிலிருந்து மும்பைக்கு கொல்கத்தா வழியாகச் சென்ற ஏர் இந்தியா விமானம் (AI180) இன்று அதிகாலை (செவ்வாய்க்கிழமை) கொல்கத்தா விமான நிலையத்தில் திட்டமிடப்பட்ட நிறுத்தத்தின்போது, அதன் ஒரு எஞ்சினில் தொழில்நுட்பக் கோளாறு ஏற்பட்டதால் பயணிகள் அனைவரும் விமானத்திலிருந்து இறக்கிவிடப்பட்டனர்.
விமானம் AI180 அதிகாலை 00:45 மணிக்கு கொல்கத்தா விமான நிலையத்தை சரியான நேரத்தில் வந்தடைந்தது. ஆனால், இடது எஞ்சினில் ஏற்பட்ட தொழில்நுட்பக் கோளாறு காரணமாக விமானம் புறப்படுவதில் தாமதம் ஏற்பட்டது.
சுமார் 05:20 மணியளவில், விமானத்திற்குள் ஒரு அறிவிப்பு வெளியிடப்பட்டு, அனைத்துப் பயணிகளும் விமானத்திலிருந்து இறங்குமாறு கேட்டுக்கொள்ளப்பட்டனர். விமானத்தின் பாதுகாப்பு நலன் கருதியே இந்த முடிவு எடுக்கப்பட்டுள்ளதாக விமானத்தின் கேப்டன் பயணிகளிடம் தெரிவித்தார்.
