இந்தியாவில் மருத்துவர்கள் மற்றும் மருந்தக உரிமையாளர்களுக்கு (Pharmacists) மிக முக்கியமானதொரு புதிய கட்டுப்பாடாக, நரம்பு வலி, வலிப்பு, ஃபைப்ரோமயால்ஜியா மற்றும் தீவிரக் கவலைக் கோளாறுகளுக்குப் பரவலாகப் பயன்படுத்தப்படும் ‘பிரிகாபாலின்’ (Pregabalin) மருந்தை, போதைக்காகத் தவறாகப் பயன்படுத்துவதையும் அதன் மீதான அடிமைத்தனத்தையும் முற்றிலும் தடுக்கும் நோக்கில் மத்திய சுகாதார மற்றும் குடும்ப நல அமைச்சகம் ‘அட்டவணை எச்1’ (Schedule H1) பிரிவின் கீழ் கொண்டு வந்து அதிகாரப்பூர்வ அரசிதழ் (Gazette) அறிவிப்பை வெளியிட்டுள்ளது.
‘மருந்துகள் (இரண்டாவது திருத்தம்) விதிகள், 2026’-இன் படி, அட்டவணை எச்1 பிரிவில் வரிசை எண் 51 ஆக இந்த மருந்து சேர்க்கப்பட்டுள்ளதால், இனிவரும் காலங்களில் அங்கீகரிக்கப்பட்ட மருத்துவர்களின் முறையான பரிந்துரைச் சீட்டு (Strictly Prescription-only) இல்லாமல் மருந்தகங்களில் இதனை நேரடியாக (OTC) விற்பனை செய்யக் கூடாது என்பதுடன், மருந்தக உரிமையாளர்கள் இந்த மருந்து விற்பனை தொடர்பான விரிவான பதிவேடுகளைக் கட்டாயம் பராமரித்து, அந்தத் தரவுகளைக் குறைந்தது மூன்று ஆண்டுகள் வரை வைத்திருக்க வேண்டும் என்பதும் விதியாக்கப்பட்டுள்ளது.
அரசிதழில் வெளியிடப்பட்ட தேதியிலிருந்து 180 நாட்களுக்குப் பிறகு இந்த அதிரடித் திருத்தம் நாடு முழுவதும் முழுமையாக அமலுக்கு வரவுள்ள நிலையில், உண்மையான நோயாளிகளுக்குத் தேவையான மருந்துகள் தங்குதடையின்றிக் கிடைப்பதை உறுதி செய்யும் அதே வேளையில், வலி நிவாரணியான பிரிகாபாலினை இளைஞர்கள் சிலர் போதைக்காகத் தவறான வழிகளில் வாங்குவதைக் கட்டுப்படுத்த மத்திய அரசு எடுத்துள்ள இந்த முக்கிய நடவடிக்கை மருத்துவத் துறையினர் மத்தியில் பெரும் வரவேற்பைப் பெற்றுள்ளது.
