ஸ்டார்ட்அப்புகளையே பொறாமைப்பட வைக்கும் பானி பூரி!
இந்தியாவில் மிகவும் ஸ்திரமான நுகர்வோர் வணிகங்களில் ஒன்றாகத் திகழும் ‘பானி பூரி’ (Pani Puri) வியாபாரம், நாடு முழுவதும் தினமும் சுமார் 5 கோடி பூரிகளை விற்பனை செய்து, ஆண்டுக்குத் தோராயமாக ₹6,000 கோடி மதிப்பிலான பிரம்மாண்ட சந்தையாக உருவெடுத்துள்ளது வியப்பை ஏற்படுத்தியுள்ளது.
உலகெங்கிலும் உள்ள பெரிய பிராண்டுகள் வாடிக்கையாளர்களைத் தங்களின் தயாரிப்புகளுக்குப் பழக்கப்படுத்த கோடிக்கணக்கில் நிதி செலவழித்து வரும் வேளையில், பானி பூரி எந்தவொரு விளம்பரமும் இன்றி மக்களின் அன்றாடப் பழக்கமாகவே மாறி, வணிக உலகிலேயே மிகவும் கடினமான ‘தொடர் நுகர்வு’ (Repeat consumption at scale) என்ற இலக்கை மிக எளிதாகச் சாதித்துக் காட்டியுள்ளது.
டெல்லியில் ‘கோல்கப்பா’, மும்பையில் ‘பானி பூரி’, கொல்கத்தாவில் ‘பூச்கா’ என வெவ்வேறு பெயர்களில் அழைக்கப்பட்டாலும், அதன் தனித்துவமான சுவை மாறாமல் அந்தந்தப் பிராந்திய கலாச்சாரத்திற்கு ஏற்பத் தன்னைத் தகவமைத்துக் கொண்டுள்ள இந்தத் தொழில், சந்தைப்படுத்துபவர்களின் ஒரு தீராத கனவு வடிவமாகும்.
இதன் பொருளாதாரப் பின்னணியைப் பார்த்தால், ஒரு பிளேட் பானி பூரி ₹20 முதல் ₹60 வரை விற்கப்படும் நிலையில், இதற்கான மூலப்பொருட்களின் செலவு மிகக் குறைவு என்பதோடு, தினமும் வாடிக்கையாளர்கள் தேடி வருவது, உடனடிப் பணப்புழக்கம் (Immediate cash cycles) மற்றும் மிகக் குறைந்த முதலீட்டுத் தேவை போன்ற சாதகமான அம்சங்கள் நிறைந்துள்ளன.
இதன் காரணமாக, பெருநகரங்களில் உள்ள பானி பூரி வியாபாரிகள் மாதத்திற்கு ₹75,000 முதல் ₹2.5 லட்சம் வரையிலும், ஆண்டுக்கு ₹10 லட்சம் முதல் ₹25 லட்சம் வரையிலும் நிகர லாபமாகவே சம்பாதிக்கின்றனர்; இத்தகைய லாபகரமான பொருளாதாரக் கணக்குகளைப் பெரிய முதலீடுகளைப் பெற்ற ஸ்டார்ட்-அப் (Startup) நிறுவனங்கள் கூடப் பார்த்துப் பொறாமைப்படும் நிலை உள்ளது.
தற்போதைய சூழலில், தெருவோரக் கடைகளாக இருந்த இந்தத் துறை, படிப்படியாக தரம் உயர்த்தப்பட்டு மிகவும் ஒழுங்கமைக்கப்பட்ட கார்ப்பரேட் வணிகப் பிரிவாக (Organised consumption) மாறி வருவது இதன் அடுத்தகட்டப் பாய்ச்சலாகப் பார்க்கப்படுகிறது.
