அமெரிக்காவின் புளோரிடா மாநிலத்தைச் சேர்ந்த 18 வயதான நெதன் தாமஸ் (Nathan Thomas), உலகின் மிகக் குறைந்த வயதில் ஆண் பேராசிரியராகப் பதவி ஏற்று புதிய கின்னஸ் உலக சாதனையை படைத்துள்ளார். இதன் மூலம் கடந்த 306 ஆண்டுகளாக முறியடிக்கப்படாமல் இருந்த வரலாற்றுச் சாதனையை அவர் தகர்த்தெறிந்துள்ளார்.
முன்னதாக, 1717-ஆம் ஆண்டு வெறும் 19 வயதில் ஸ்காட்லாந்தின் மாரிஷல் கல்லூரியில் கணிதப் பேராசிரியராக நியமிக்கப்பட்ட காலின் மெக்லாரின் (Colin Maclaurin) பெயரிலேயே இந்தச் சாதனை இருந்தது. தற்போது, 18 வயது 346 நாட்களில், அமெரிக்காவின் மியாமி டேட் கல்லூரியில் (Miami Dade College) பொறியியல் விரிவுரையாளராகப் பணியில் சேர்ந்த நெதன் தாமஸ், அந்த வரலாற்றுச் சாதனையை முறியடித்துள்ளார்.
நெதனின் கல்விப் பயணம் மிகவும் வியப்பூட்டும் வகையில் அமைந்துள்ளது. சிறு வயதிலேயே அவரது அசாதாரண அறிவுத் திறன் வெளிப்பட்டது. 10 வயதிலேயே கல்லூரிப் படிப்பைத் தொடங்கிய அவர், 14 வயதில் புளோரிடா இன்டர்நேஷனல் பல்கலைக்கழகத்தில் (Florida International University) சேர்ந்தார். அங்கு மின் பொறியியலில் இளங்கலை மற்றும் முதுகலை பட்டங்களை, இரண்டையும் சிறப்புத் தரத்துடன் (Honours) வெற்றிகரமாக முடித்துள்ளார்.
தற்போது, மியாமி டேட் கல்லூரியில் ‘C for Engineers’ (COP 2270) என்ற கணினி நிரலாக்கப் பாடத்தை, தன்னுடைய வயதிற்கு இணையான அல்லது தன்னை விட மூத்த மாணவர்களுக்கே கற்பித்து வருகிறார். வயது என்பது கற்பிப்பதற்கு ஒரு தடையல்ல; கற்றுக்கொள்ளும் ஆர்வம்தான் முக்கியம் என்று அவர் கூறியுள்ளார்.
பேராசிரியர் பணியுடன் மட்டுமல்லாமல், தற்போது மியாமி பல்கலைக்கழக சட்டக் கல்லூரியில் (University of Miami School of Law) சட்டப் படிப்பையும் பயின்று வருகிறார். எதிர்காலத்தில் அறிவுசார் சொத்துரிமை (Intellectual Property Law) மற்றும் STEM துறைகளுடன் தொடர்புடைய சட்டத்தில் நிபுணத்துவம் பெற விரும்புவதாகவும் தெரிவித்துள்ளார்.
கின்னஸ் உலக சாதனை அமைப்பு வெளியிட்டுள்ள தகவலின்படி, நெதன் தாமஸ் தனது சாதனையால் உலகம் முழுவதும் உள்ள இளைஞர்களுக்கு ஊக்கமளிக்க விரும்புவதாக தெரிவித்துள்ளார். “வயது என்பது சாதனைக்குத் தடையல்ல; விடாமுயற்சியும், தொடர்ந்து கற்றுக்கொள்ளும் ஆர்வமும்தான் வெற்றியின் ரகசியம்” என்பதே அவரது வாழ்க்கைப் பயணம் சொல்லும் முக்கியப் பாடமாகும்.
