மக்களவை எதிர்க்கட்சித் தலைவரும், காங்கிரஸ் எம்பியுமான ராகுல் காந்தியின் பிறந்தநாளை முன்னிட்டு, உத்தரப் பிரதேச மாநிலம் வாரணாசியில் (காசி) கங்கை நதிக்கரையில் ஒன்றுதிரண்ட இளைஞர் காங்கிரஸ் தொண்டர்கள் வினோதமான முறையில் தங்களின் வாழ்த்துகளைத் தெரிவித்துக் கொண்டாடினர்.
இந்த விழாக் கொண்டாட்டத்தின் போது, ராகுல் காந்தியைப் ‘பகவான் பரசுராமர்’ அவதாரமாகச் சித்தரிக்கும் ஒரு பிரம்மாண்ட போஸ்டரைத் தொண்டர்கள் கைகளில் ஏந்தி நின்று முழக்கமிட்டனர். அந்தப் போஸ்டரில், ராகுல் காந்தி ஒரு கையில் பரசுராமரின் ஆயுதமான கோடாரியையும் (மழு), மற்றொரு கையில் இந்திய அரசியல் சாசனப் புத்தகத்தின் (Constitution) பிரதியையும் ஏந்தியிருப்பது போல வடிவமைக்கப்பட்டிருந்தது பெரும் கவனத்தை ஈர்த்துள்ளது.
ராகுல் காந்தி தொடர்ந்து நாடு முழுவதும் அரசியல் சாசனப் பாதுகாப்பை வலியுறுத்தி வரும் நிலையில், அதற்கு ஆன்மீக மற்றும் தீவிரப் போராட்ட வடிவத்தை இணைக்கும் ஒரு அரசியல் செய்தியாக இந்தத் தனித்துவமான போஸ்டர் தற்போது சமூக ஊடகங்களில் அரசியல் வட்டாரத்திலும் விவாதப் பொருளாக மாறியுள்ளது.
