தமிழ்நாடு சட்டமன்றத் தேர்தலில் தனித்துப் போட்டியிட்டு, அண்மையில் புதிய அரசை அமைத்துள்ள ‘தமிழக வெற்றிக் கழகம்’ (தவெக) கட்சியை, எம்.ஜி.ஆர். பாணியில் தேசிய அளவில் விரிவுபடுத்துவதற்கான முதற்கட்டப் பணிகள் ரகசியமாகத் தொடங்கியுள்ளதாக அரசியல் வட்டாரங்களில் புதிய தகவல் பரவி வருகிறது.
தமிழகத்தில் அரை நூற்றாண்டு கால இருதுருவ அரசியலை உடைத்து ஆட்சிக்கட்டிலில் ஏறியுள்ள முதலமைச்சர் சி.ஜோசப் விஜய், அண்டை மாநிலங்களான கேரளா, கர்நாடகா, ஆந்திரா மற்றும் புதுச்சேரி ஆகிய பகுதிகளில் ஏற்கனவே வலுவாகச் செயல்பட்டு வரும் தனது ‘விஜய் மக்கள் இயக்கம்’ (VMI) நற்பணி அமைப்புகளின் கட்டமைப்பை, இப்போது தவெக கட்சியின் அதிகாரப்பூர்வ மாநிலக் கிளைகளாக மாற்றத் திட்டமிட்டுள்ளதாகக் கூறப்படுகிறது. எம்.ஜி.ஆர் அவர்கள் திமுகவிலிருந்து பிரிந்து அதிமுகவைத் தொடங்கிய குறுகிய காலத்திலேயே, அதனைத் தேசியக் கட்சியாக மாற்றும் நோக்கில் ‘அனைத்திந்திய அண்ணா திராவிட முன்னேற்றக் கழகம்’ எனப் பெயர் மாற்றிப் பிற மாநிலங்களிலும் கிளைகளைத் தொடங்கிய வரலாற்றுப் பாணியை, தற்போதைய தவெக தலைமையோ அல்லது அதற்கு வியூகம் அமைத்துக் கொடுக்கும் குழுவினரோ கையில் எடுத்துள்ளதாகத் தெரிகிறது.
தமிழகத்திற்கு வெளியே உள்ள தமிழ் மக்கள் மற்றும் விஜய் ரசிகர்களின் வாக்கு வங்கியை ஒருங்கிணைப்பதன் மூலம், தவெகவை ஒரு பிராந்தியக் கட்சியாக மட்டும் சுருக்கிக் கொள்ளாமல், வருங்காலத்தில் இந்திய அளவில் ஒரு முக்கிய தேசிய சக்தியாக நிலைநிறுத்துவதற்கான மாஸ்டர் பிளான் இது என்றும், இதற்கான பூர்வாங்கப் பணிகள் பிற மாநில நிர்வாகிகளுடன் விரைவில் தொடங்கப்படலாம் என்றும் அரசியல் விமர்சகர்கள் கருத்து தெரிவித்து வருகின்றனர்.
